聖誕嘅奇蹟
話說我12月頭無啦啦人生第一次出疹，由手指蔓延到去小腿，夜晚痕到瞓唔到，R到流血超恐怖。睇咗中西醫，食西藥搽類固醇搞唔掂，已經戒口好多嘢唔食得，再食多六制中藥好少少，之後有返發😱 晚晚沖凍水涼用死海鹽捽啲疹先可以冇咁痕，有時半夜三四點要再沖先訓到。
日日都出唔到街，前幾日朋友拎咗個Christmas tea set上嚟同我慶祝，呢個就係我今年唯一嘅聖誕慶祝活動。佢哋睇完我啲疹之後話你應該要 gluten free 喎！再有另外一個朋友問佢阿媽，都係咁講，淨係可以食粥同埋烚熟嘅菜，豉油都唔可以落。
如是者我24號開始全日食粥同烚菜，咖啡都唔俾飲，覺得人生完全冇意義，點知！瞓咗一晚奇蹟就發生！今日聖誕節一起身發現啲疹好咗八九成，之前又痕又突出黎嗰啲無啦啦結晒焦，全晚冇痕過瞓得幾好。成個月搞咁多嘢洗咁多錢，最後原來食粥先係最有效嘅方法😂
今日又係全日食粥，同埋只係落咗少少鹽嘅菜（仲有 1:99 雞湯米粉）如果今晚都唔痕我聽日就可以出去開聖誕party啦！不過所謂開party我乜嘢都唔可以食，要帶住自己啲粥仔出去🤣 好似啲BB咁要成日帶奶樽同Babyfood，完全唔可以食出面啲嘢。
我依家發夢都諗住食乜食乜，已經save 低個list 寫低好返之後想食啲乜，希望呢個奇蹟繼續我快啲好返啦。最後祝大家聖誕快樂🎄🎅🏼❤️ 明年會更好✨
Search